Više stotina ljudi protestovalo je u Njujorku, a grupe pacifista izašle su na ulice američkih u kanadskih gradova, u „Danu masovne akcije” protiv eventualnog rata sa Iranom.

Oko 500 demonstranata okupilo se na Tajms skveru na Menhetnu i uputilo se ka sjedištima misije SAD u Ujedinjenim nacijama i izraelskom konzulatu. Demonstranti su na početku kolone nosili transparent s natpisom: „Ne ratu, ne sankcijama, ne intervenciji, ne ubistvima!”  – Potezi iranske vlade ni na koji način ne opravdavaju rat SAD sa Iranom –  rekla je na protestu dopisniku agencije FP Debra Svit, direktorka organizacije „Svijet ne može da čeka”. Na protestu koji je organizovalo oko 60 organizacija, dijeljen je i letak na kojem je pisalo da je „na mnogo načina rat SAD protiv Irana već počeo”, i navedeni primjeri kao što su „oštre ekonomske sankcije” protiv Teherana, „ubistva iranskih nuklearnih stručnjaka u napadima automobilima bombama” i činjenica da se „kod iranske obale nalaze američki nosači aviona”. U Los Anđelesu, aktivisti su bili obučeni u narandžasta zatvorska odijela i nosili crne kapuljače, slične kao zatvorenici u Gvantanamu. Mirovni protesti održani su i u Bostonu, Čikagu, Filadelfiji, San Francisku, Vašingtonu, a u Kanadi u Kalgariju i Vankuveru. Slični skupovi planirani su i u Velikoj Britaniji, Irskoj i Indiji.

(Agencije)